Riwayat Utuh Cangkal #3

Utuh Cangkal wahini baisian gawian hanyar, tagal nang nia kada umpat urang lagi. Abahnya manyuruhakan mairit itik ka pahumaan.

"Dijaga tuh lah, kalu pina malincai taradak urang!" ujar nang abah manuduhi.

Basangu buluh sabilah, Utuh Cangkal taduduk di bawah puhun Maritam. Imbahanu batingadah, balilihat kalu pina ada nang masak. Tapi nang ngaran kada musimnya, kadada nang dililihat. Managuk liur ay Utuh Cangkal, taungut pulang maliatakan itik.

Sambil maitihi itik nang pina karamian mandian, kaganangan pulang Utuh Cangkal wan tatakunan abahny, "Imbah pang dapat lah hudah gantiannya?" suara garau abahnya asa mandangung haja masih di talinga Utuh Cangkal.

Bujur pang Utuh Cangkal kada mamikirakan lagi wan Galuh Bengkeng, tapi ay inya masih supan lawan nang abah lantaran ditakuni tarus. Nang kaya lakun kada kawa mancari gagantiannya tu ha.

Pas pahahaurannya mamikirakan nang abah, kada karasaan bubuhan itik sudah sampai ka pahumaan julak Isah. Maka julak Isah nih binian nang paling panyarikan sudah di kampung.

"Nah iya am... Mamak am aku... " jar Utuh Cangkal mangusai tangan ka kapalanya saurang.

Kada lawas, pas tabarungan julak Isah datang. Muhanya habang hirang malihat itik-itik Utuh Cangkal bajugit guyang dumang di pahumaannya. Mata manciling ganal pada buak, hinak bilang kaya urang handak mati. Padahal bamamai bahimat nih sidin, tapi kita sensor haja, supaya kada talajari kakanakan bahasa nang kada baik.

Singkat kisah, julak Isah manjinjit talinga Utuh Cangkal sampai ka muha nang abah.

"Anak ikam nih!" jar julak Isah. Kada usah baucap banyak julak Isah tuh, urang-urang langsung paham.

"Kanapa garang, nak?" jar nang Abah, asa kada purun jua handak manyariki Utuh Cangkal nang talinganya hudah mahabang.

"Sudah ulun pikirakan bah ay... "

"Ay? Bapandir apa ikam?" abahnya bingung mandangar sahutan Utuh Cangkal.

"Ulun handak bacari gawian ka banjar, kalu pina mau jadi urang sugih."

Mandangar sahutan Utuh Cangkal, nang abah mangulum lihum, paham napa nang sabujurnya ada di hati nang anak.

"Oo, damintu ah. Ayuha. Cari gawian nang bujur-bujur lah. Nang panyambahiyang, nang kada wani lawan kuwitan."

"Nah, napa jadi pian pulang nang pina mauk abahnya?" ujar julak Isah tanganga. Utuh Cangkal takurihing, kada marasa lagi talinga bilang handak rabit dijinjit julak Isah, lantaran dibulihakan nang abah marantau.