Hari ini Utuh Cangkal siap sudah tulak ka Banjar. tas pina mahibak, kutak mi sabuah pisit bakarut tali rumput japang. Dikawani abahnya, Utuh Cangkal manyambang mutur kul di pinggir timbuk. kada lawas, ada sabuah manyinggahi. abahnya Utuh Cangkal batatawaran lawan supir taksi, kalu pina hakun tamurah jar. Imbah tarukuy, Utuh Cangkal disuruh nang abah babuat, supir mangkutakan tas wan kutak Utuh Cangkal ka balakang mutur.
"Babuat ha ikam Tuh ay," ujar nang abah.
Imbah mancium tangan nang kawitan, Utuh Cangkal babuat, inya duduk di panangahan. di dalam mutur malaran haja banyak urangnya. muhanya pina kauyuhan, sapalih ada nang taguring, limbui ha paluhnya.
"Sahuaran lagi nak," jar abahnya. supir nang tadi sudah handak manyatatar mutur kada jadi.
"Napa pulang, bah?" Utuh Cangkal bajanguk di jandila mutur.
"Ni alamat kaka ikam nang di banjar nah, kaina datangi inya."
"Ay, adakah ulun baisian kaka, bah?" Han kalu Utuh Cangkal pina hungang, lawan kaka saurang maka kada tahu.
"Astaghfirullah... bujuran kada tahu ah? Han baik jua kusambat, caka tida bisa tapabini lawan kaka saurang. ni nah alamatnya. ngarannya Maskanah. gambarnya di rumah nak ay, kada sawat lagi aku maambilakan nah. ikam takuni haja gin kaina langsung, 'ikam iya ah Maskanah?' tu."
imbah manjurung kartas nang batulisan alamat ngitu, langsung ay muturnya bajalan. tapancar banyu mata abahnya Utuh Cangkal.
"Kada karasaan ganal sudah anakku... mudahan ay kada lawas inya marantau. lawan umanya baduaan haja di rumah nih apa sunyi banar," jar abahnya dalam hati. sidin mamusut ka mata, mambuangi banyu mata nang tatitik.
kada karasaan, mutur nang dibuati Utuh Cangkal sampai di tarminal Banjarbaru. sambagai kanapa kah supirnya nih jadi bamandak, nang masi wara lalu babayar banar ay. bubuhan panumpangnya turunan minuman, ada jua nang ka wc. Utuh Cangkal nang kada suah ta ka kuta, dimhatinya ni tih di banjar sudah. inya turun, bajalan balinggang masuk ka gadung pasar tarpadu Banjarbaru, nang urang rancak manyambatnya Hero. inya dahulu tuh pamulaan banar isinya Hero pang, mun wahini baganti Giant sudah.
Sapamasuk Utuh Cangkal ka Giant, muturnya tulak. saikung-ikung kada nang tahunya asanan ada nang tatinggal. mutur Utuh Cangkal tulak jauh sudah, Utuh Cangkal sampai di Banjarbaru haja, tapi asanannya iya di Banjar sudah.
Di dalam Giant, mata Utuh Cangkal langsung silau malihat susunan buku di lamari ganal toko buku Salemba. Utuh Cangkal bajalan mandatangi toko tutih. Inya nih urangnya dasar katuju pang lawan buku. apalagi buku bagambar, mun banyak tulisannya kada tapi katuju. napang mambaca bahija, jadi inya mangulir mun mambaca nang banyak.
Pamulaan masuk, Utuh Cangkal asa ngalih handak balilihat banar. Kada tahan banarnya inya malihat buhan pagawainya nang baindruk singkat, baju pina katat, rambut disanggul nang maungkayakan gulu panjang kaya nintu pulang. umaa dunia wahini lahay... jar Utuh Cangkal dalam hati sambil mamusut dada, kada ingat inya baistighfar wan bataawudz, minta lindungiakan Nang Ampunnya.
Sambil bakuliling di sasala rak buku, Utuh Cangkal mancari buku nang sudah bakuyak. supaya kawa dibacainya. pas pararamiannya baliliat buku, ada saikung pagawainya nang baparak, managur nu Utuh Cangkal.
"Assalamu alaikum, ada yang bisa kami bantu, mas?" ujarnya sambil bakurihing manis. baik jua Utuh Cangkal nih rancak haja maliat tipi di rumah, jadi mangarti haja napa nang disambat pagawai tadi.
"Wa alaikum salam..." Utuh Cangkal kada kawa lagi manarusakan bapandir, wayah inya mancagatakan awak imbah maambil buku di rak bawah, tacangangi bungasnya ading nang ada di hadapannya.
pagawai nang nia lain banar pada pagawai nang lainnya, mun nang lain babaju bilang kaya kahandakan balaki, maubral banar. mun nia asa nyaman banar dilihat. karudungnya panjang hampai ka parut, bajunya gin pina talunggar pada nang lain, tangan bajunya pina kaganalan, sampai ka punggung tangan hujungannya. indruknya kada kahalusan kaya kakawanannya, tajuntai sampai manutupi sapatunya. mun muha, Utuh cangkal sawat tacangangi bibir tipisnya nang takurihing haja, nang lainnya kada sawat tajanaki. inya maingatkan banar papadahan guru Fadil, jangan tapi bahimat mancangangi binian.
"Gimana, mas?" ujar ading bungas itu pulang, mambangunakan hayalan Utuh Cangkal.
Uma ay ding, bungasnya pian nih... hakun balaki lawan kaka lah? ujar Utuh Cangkal tapi dalam hati haja.
"Eh, anu... bus pian ada di sini lah? Ulun handak umpat bagawi di sini," ucap Utuh Cangkal sambil manguracak ka buku nang diambilnya tadi, matanya sambil maitihi buku nang dikuracaknya.
"Wah kalo atasan kami tidak ada di sini, mas. Tapi maaf banget, untuk lowongan pekerjaan kami juga belum ada. kebetulan saya sendiri HRD-nya." si galuh pina bisa banar maulah muha wan lagu sadih bapandirnya, prihatin lawan Utuh Cangkal. Utuh Cangkal makin dandaman jadinya.
"Ooh damintu kah, ding? Ayu ay lah. Ulun bulik ay mun kytu," jar Utuh Cangkal sambil maandak pulang buku nang tadi dikuracaknya.
Si pagawai bungas bahinak basar malihat buku nang sudah kusut ngitu. tapi inya asa kada purun manyuruh Utuh Cangkal manukari, muhanya pina marista banar pang. diambil ay buku tadi ulih pagawai bungas, dibawanya ka kasir, langsung ditukarinya.
Kaluar pada Giant, hanyar kaganangan Utuh Cangkal lawan barang-barangnya. pamulaannya huhulingang hulu, hanyar ingat asanan balum diambil di mutur. Utuh Cangkal mambuliki ka tarminal. tapi muturnya kadada lagi.
"Mutur putih nang di sia tadi mana, cil?" jar Utuh Cangkal pina katakutanan.
"Nang mana, banyak nang ay mutur putih!" ujar acil warung asa sangkal ditakuni Utuh Cangkal kaya nintu.
"Nang mambawa ulun tadi pang..." Utuh Cangkal bakaras. parak sudah acil warung mahimpat cubik, baik jua ada amang nang manyahuti.
"Paling batarus ka banjar tuh ay..."
"Eh, ini lain Banjar kah?" ujar Utuh Cangkal tanganga.
Tidak ada komentar:
Posting Komentar